EFE | Unha banda acusada de perpetrar polo menos 18 roubos en negocios da provincia de Lugo foi desmantelada coa detención dos seus cinco integrantes. Segundo informa a Garda Civil, actuaron nas localidades de Friol, A Pastoriza, Outeiro de Rei, Vilalba, Castroverde, Xermade, Begonte e a cidade de Lugo.
Os membros do grupo asaltaban almacéns, naves industriais, explotacións gandeiras e ata vivendas, segundo as conclusións da investigación da Garda Civil, que se prolongou durante cinco meses.
Agora, os tres principais detidos foron identificados coas iniciais M. F. C., de 28 anos, residente en Lugo; D. C. C., de 42 anos de idade, un veterinario residente en Pol; e A.A.V., con domicilio tamén en Lugo, de 30 anos e que rexenta unha empresa de construción.
A Garda Civil considera a M. F. C autor material de todos os roubos investigados, mentres que aos outros dous detidos só os relaciona cunha parte dos delitos. Con todo, os investigadores cren que facilitaron información e encargos ao primeiro para logo beneficiarse tamén da venda do material roubado.
Así mesmo, a Garda Civil tamén procedeu á detención de G.O.S., de 26 anos de idade, con residencia en Betanzos, e de A. M.S., de 19 anos domiciliado en Guitiriz, ambos dedicados á compravenda e reparación de maquinaria usada. Estes dous últimos mozos serían os responsables da venda e distribución de boa parte do material subtraído, segundo a investigación.
DENDE TRACTORES ATA XERADORES ELÉCTRICOS
Entre o material subtraído figura maquinaria de xardinería e forestal (rozadoras, tractores cortacéspede, cortasetos, motoserras, sopradores) e de construción (amoladoras, trades, martelos percutores, hidrolimpadoras, equipos de soldadura, xeradores eléctricos), ferramentas cuxo valor supera os 50.000 euros.
Os detidos tamén están acusados de suposta implicación no roubo de xoias en dúas vivendas por un valor duns 7.000 euros. A Garda Civil logrou recuperar boa parte do material roubado.
