A Comisión Permanente do Consello Xeral do Poder Xudicial (CGPJ) acordou este mércores renovar as medidas de apoio para reforzar os xulgados do Social de Lugo e a Audiencia Provincial luguesa durante seis meses co fin de “facer fronte á carga de traballo”.
Así o informou o Tribunal Superior de Xustiza de Galicia (TSXG), que concretou que o CGPJ deu o visto e prace á renovación da comisión de servizo con relevación de funcións a favor de Paula Ventosa Bermúdez, xuíza de adscrición territorial do alto tribunal galego.
Ademais, o CGPJ deu o visto e prace, dentro da execución do plan extraordinario de reforzo en materia de despedimentos, á renovación da comisión de servizo con relevación de funcións a favor de Eladio Prieto Bellas, titular do Xulgado do Penal número 1 de Lugo.
As dúas medidas de apoio establecéronse durante seis meses, indicou que o TSXG, que engadiu que para tomar esta decisión, a Comisión Permanente tivo en conta a evolución e o estado dos órganos a reforzar.
A dedicación media dos xulgados do Social de Lugo, indica o YSXG, “foi moi superior ao módulo establecido en todos os períodos analizados: 137% en 2017, 132% en 2018 e 168% en 2019”.
A pesar diso, a 31 de decembro de 2019 estes órganos tiñan unha pendencia media de 1.433 asuntos, cando a media en Galicia de casos pendentes destes xulgados é de 837; e, a estatal, de 793, sinalan as mesmas fontes.
Así mesmo, o tempo medio de resposta, a 31 de decembro de 2019, era de 14,4 meses, tamén superior á media da comunidade autónoma, que era de 9,9 meses.
En canto á entrada media de asuntos computables, en 2017 foi un 151% superior ao módulo que establece o CGPJ; en 2018, un 148%; e, en 2019, un 154%.
COMISIÓN DE SERVIZO
O CGPJ tamén aprobou unha medida de apoio para reforzar a Sección Primeira da Audiencia Provincial de Lugo, consistente nunha comisión de servizo sen relevación de funcións a favor de Sandra María Piñeiro Vilas, maxistrada titular do Xulgado de Instrución número 2 de Lugo.
O reforzo terá lugar durante seis meses, desde o 1 de xuño ao 31 de decembro de 2020, excluído o mes de agosto e a comisionada asumirá tres relatorios semanais, concretou o TSXG.
