EFE | Axentes do Corpo Nacional de Policía tiveron que intervir en Lugo para que un paciente psiquiátrico puidese recibir asistencia por parte dos servizos sanitarios, dado que o mozo se “atrincheirou” na súa casa e “non quería saír”.

Os feitos sucederon onte pola tarde, cando a Comisaría Provincial recibiu unha chamada a través do teléfono 091 para reclamar a presenza da policía nunha vivenda da zona de Fingoi, en Lugo capital, onde un mozo se “atrincheirara” e se negaba a ser atendido polos servizos sanitarios.

Ante “o perigo” que podía supoñer a intervención, informa a Policía Nacional, os axentes desprazados solicitaron a intervención dos Bombeiros para acceder a través da porta principal ou ben “buscar unha alternativa” para entrar no domicilio.

Lograron entrar a través da porta principal, “coas medidas de protección necesarias”, e os axentes atoparon o mozo, de vinte anos, agochado no baño. Finalmente, os policías lograron convencelo para que saíse e acompañase aos sanitarios ao HULA. EFE