En Parga (Guitiriz), a veciñanza anda “coa mosca tras da orella” ante a limitación dalgúns servizos durante o estado de alarma. O peche parcial da oficina de Abanca, logo do intento de clausurala totalmente hai dous anos, e a centralización dos centros de saúde, failles temer que estas medidas non só teñan carácter temporal, senón que sexan o primeiro paso dun desmantelamento de servizos que redunde no “abandono” da vila.
Afonso Losada, da plataforma ‘Parga Non se Divide’, expresa a “desconfianza” da poboación, especialmente coa cuestión da oficina de Abanca. Co inicio da actual situación excepcional, e por mor das restriccións sanitarias, o local pasou a atender ao público tan só dous días á semana. “Precisamente o que nos ofrecían hai un par de anos, despois de intentar pechala de todo“, explica Losada.
Contextualiza así unhas sospeitas cuxa xustificación “vén de atrás”. Daquela, di, só a “organización veciñal coa súa presión” conseguiron parar os pés ao peche da oficina de Abanca na localidade.
“A OFICINA ESTÁ DESBORDADA”
‘Parga Non Se Divide’ entende a limitación de acceso e de horario imposta pola crise do coronavirus, pero coida que “a situación xa evolucionou” e que cómpre retornar á normalidade. “A oficina está desbordada. Hai unha soa persoa á quen en dous días se lle acumula o traballo de toda a semana, e máis aínda agora que se están tramitando un montón de axudas“, precisa Losada. Ademais, segue, fórmanse continuas ringleiras na beirarrúa que pouco contribúen a garantir a seguridade.
Non lles ofrece moita confianza tampouco o feito de que nesta oficina non haxa nin un só cartel informativo no que se indique o carácter temporal deste cambio de horario. “Noutros locais si que o poñen, pero aquí non”. Presentaron varias reclamacións vía telemática, pero “dado que a entidade non responde”, continúa o “temor de que isto quede así indefinidamente”.
PECHE DO CONSULTORIO
Situación parecida acontece co consultorio sanitario de Parga. A reorganización prevista polo Sergas para actuar durante a pandemia implicou o peche dalgúns centros de saúde para agrupar a atención nun só único lugar. Desta maneira, o centro de saúde de Guitiriz —”xa saturado antes”— ocúpase tamén da atención que correspondía ao consultorio de Parga.
“A medida non é moi coherente coa prohibición de desprazamentos e de evitar as aglomeracións”, valoraba o voceiro da plataforma ‘Parga Non Se Divide’. “A dispersión territorial e de servizos pode ser boa para manter os servizos indispensables preto da cidadanía”. Neste caso, si que existe un “compromiso” explícito de restablecer o servizo unha vez remate o estado de alarma, algo que esperan que efectivamente se cumpra.
“QUEREMOS UN FUTURO PARA PARGA”
“Tanto o tema da oficina de Abanca coma o do centro de saúde é visto con preocupación en Parga”, confesa Afonso Losada. “Non é unha vila precisamente en auxe” e calquera recorte pode acabar por cavar a súa tumba. “Queremos un futuro para a nosa vila. Agora mesmo temos moitas frontes abertas e non queremos ter máis”, remata.
