A Garda Civil continúa realizando controis para garantir o cumprimento do estado de alarma. Entre as denuncias máis curiosas en Lugo, está a dun home que foi sorprendido ata en tres ocasións en días diferentes nun bus urbano sen xustificación algunha. Os axentes tamén denunciaron outro home que conducía o coche para levar o seu can a pasear ao monte.
Segundo informou o Instituto Armado, o pasado martes levou a cabo unha actuación conxunta de diferentes unidades do corpo que permitiu a detección de “numerosas infraccións a distintos regulamentos”, como incumprimento das restricións de mobilidade persoal e infraccións ao regulamento xeral de circulación.
O dispositivo efectuouse nas inmediacións da capital luguesa, en concreto no quilómetro 500,500 da estrada N-VI, no termo municipal de Lugo, entre outras “localizacións aleatorias”. “O operativo desenvolveuse con normalidade, levantando gran expectación dada a cantidade de medios humanos e materiais empregados, aínda que a tónica xeral é que estas medidas son ben acollidas e entendidas polos usuarios”, destacou a Benemérita.
En relación ao cumprimento das restricións de circulación impostas polo estado de alarma, os axentes detectaron a un home que foi denunciado tres veces en distintos días “sen xustificación algunha” a bordo dun autobús urbano.
En relación ao incumprimento do confinamento, os axentes interceptaron sobre as 14:00 horas do martes na N-640 un vehículo ocupado por un home, que argumentou que se desprazaba ao monte para que o can que o acompañaba dese un paseo.
