Ana Belén Fernández | Imos “acostumándonos” a vivir coa Covid-19. Levamos camiñada a primeira quincena e imos sumar outra quincena de corentena. Iso de momento. Encerrados na casa xa se perde a noción do tempo. Que día é hoxe? O día da semana que é, case non importa; creo que xa nin sabemos os días que levamos encerrados e xa deixamos de formularnos os que nos quedan. É máis saudable.

Chegou un invasor invisible para atacarnos, pero este invasor, parece que non é malo en si mesmo, senón que colle vida ao entrar en contacto con nós. E xa estamos vendo que tipo de vida colle. Despois destes días vaise incrementando a conciencia social, aínda que siga habendo excepcións. Nótase esta semana, despois das últimas limitacións ao movemento de traballadores. Xa case non escoito coches pasar desde o piso no que estou e na rúa é raro atoparse con alguén.