Os versos de Rosalía de Castro soarán da boca dunha vintena de poetas este venres na capital lucense. A Deputación acollerá o acto ‘Día de Rosalía: entre versos e adagios’, unha das actividades incluídas na programación cultural do Mes de Rosalía co gallo do aniversario do nacemento da autora.
A partir das 20:00 horas, no salón de actos do Pazo de San Marcos, a homenaxe correrá a cargo de Xosé Otero, Marica Campo, Tareixa Campo, Adela Figueroa, Ana Mar Fraga, Ana Gamallo, Fernando García, Ánxela Gracián, Chelo Gayoso, Paco Ledo, Dulce María López, Emilia Martínez, Martiño Maseda, Adolfina Mesa, Toño Núñez, Conchita Paz, Luisa Paz, José Pedreira, Ana Rey, Isabel Rodríguez, Xosé Carlos Ulloa e Branca Villar. Elas e eles recitarán poemas e textos de Rosalía de Castro, ademais doutros de autoría propia relacionados con temáticas presentes na obra rosaliana.
Asemade, a cantautora Paloma Suanzes encargarase do acompañamento musical do acto, que dirixirá Montserrat González, responsable do Servizo de Normalización Lingüística da Deputación de Lugo.
