A Vicepresidencia da Deputación de Lugo promoverá un acto de homenaxe a Benedicta Sánchez, actriz do Corgo que vén de conseguir o Premio Goya á Mellor Actriz Revelación polo seu papel en ‘O que arde’.

O seu debut na gran pantalla valeulle o recoñecemento da Academia do Cine Español. Na película de Óliver Laxe, Benedicta Sánchez interpreta a nai dun pirómano que volve á casa tras saír do cárcere. “Benedicta puxo cara ás mulleres rurais galegas, á súa fortaleza e saber estar”, subliñou a vicepresidenta da Deputación, Maite Ferreiro.

Con este acto, aínda por determinar, a Vicepresidencia quere parabenizar a esta veciña do Corgo que xa fixo historia canda ‘O que arde’: é a película en galego máis vista en salas, ademais de ser o primeiro filme no noso idioma que foi recoñecido no Festival de Cannes.