Unha moza resultou ferida despois de envorcar o vehículo que conducía tras saírse da vía na cidade de Lugo.
Segundo informou o 112 Galicia, o accidente ocorreu sobre as 22,15 horas deste martes cando a condutora e única ocupante do vehículo circulaba pola Avenida de Benigno Rivera, en Pías, na cidade de Lugo.
Ata o lugar, desprazáronse os Bombeiros da cidade, que foron alertados polos xestores do 112 Galicia despois de recibir a chamada dun alertante, o cal informou dun coche envorcado cunha persoa no seu interior e con dificultades para saír.
Así mesmo, por parte do 112, informouse os feitos a Urxencias Sanitarias de Galicia-061, aos axentes de Tráfico, da Policía Local e aos efectivos de Protección Civil.
Os Bombeiros confirmaron ao 112 Galicia que a moza fora excarcerada do interior do turismo e trasladada polos servizos sanitarios. En concreto, o 061 enviou unha ambulancia que levou á moza R.G.M., de 32 anos, ao Hospital Universitario Lucus Augusti (HULA) de Lugo.
