O cemiterio municipal de Lugo acollerá o vindeiro domingo 15 de decembro a última das catro visitas teatralizadas promovidas polo Concello e destinadas a promover culturalmente o lugar.
Así o anunciou a concelleira de Participación e Servizos para a Veciñanza, Cristina López, quen engadiu que, con esta iniciativa, “se pretende mostrar a cara máis cálida e emocional” do cemiterio e “pór en valor o patrimonio funerario”.
A representación, limitada a 50 persoas, ten como título ‘E logo ti… Quen vés sendo?’ e corre a cargo do grupo Achádego Teatro, que interpretará a diferentes personaxes e contarán aspectos das súas vidas, “axudando a situalos no tempo e rememorando a historia da cidade“.
EXPOSICIÓN SOBRE PICASSO
Por outra banda, a cidade de Lugo converterase en escenario da exposición itinerante ‘Picasso, a viaxe do Guernica’ que organizan La Caixa e o Museo Reina Sofía.
A mostra, que conmemora o 80 aniversario da creación da emblemática obra, parará na Praza Horta do Seminario entre os días 18 de decembro e 15 de xaneiro.
