A alcaldesa de Lugo, Lara Méndez, acompañada pola concelleira que se ocupa da área de Gobernanza, Paula Alvarellos, anunciou este venres o inicio dos traballos para recoller as pegadas dixitais dos funcionarios municipais, co obxectivo de implantar un sistema de control horario.

A rexedora local tamén informou de que o Concello acaba de aprobar un novo regulamento interno que permitirá reducir á metade os protocolos de tramitación interna, o que á súa vez redundará nunha maior axilidade en “todos os procedementos administrativos”. Segundo o seu criterio, “permitirá homoxeneizar os procesos administrativos e reducir á metade os máis de 225 protocolos de traballo existentes”, precisou.

“O obxectivo é ser máis operativos, mantendo a seguridade xurídica e legal”, engadiu a alcaldesa, pero “mellorando tamén os índices de transparencia”.

“Ademais deste novo regulamento, que afecta a todos os departamentos do Concello, hoxe mesmo asinarei un novo decreto, máis específico, para impulsar especialmente esa optimización de recursos na área de Gobernanza, Economía e Recursos Humanos”, aclarou.

É unha área que comprende servizos de gran demanda como contratación, fomento e patrimonio, facenda local, inspección de tributos e persoal.