A parroquia de Montecubeiro, no municipio de Castroverde, será o escenario elixido para a celebración, o vindeiro sábado 21, do III Edición de ‘Son Labrego‘, evento que organiza o Sindicato Labrego Galego coa colaboración do concello.
Así e tras pasar anteriormente por Sarria e Chantada, a terceira edición trasládase a Castroverde baixo o epígrafe ‘Ecofeminismo e monte comunal’. A concelleira de Cultura, Pilar Ferreiro, destacou que a contorna onde se vai a celebrar é “un lugar único e ideal” para coroar todas as actividades programadas para ese día, que van “dirixidas a todo o público”.
A edición deste ano contará cunha mesa debate sobre ‘alternativas produtivas ao noso monte’, sesión vermú, unha foliada e a partir 23.00 horas os concertos de ‘Sacha na Horta’ e ‘Tecor Societario’.
A representante do Sindicato Labrego Galego, Sonia Vidal, valorou que se trata dun evento “consolidado” co que se busca visibilizar o traballo no rural e, nesta ocasión, a “moi importante” labor da muller e o monte comunal. Ademais deste programa, haberá postos de artesanía, comida e bebida nunha zona de acampada, ademais dunha carpa para anticiparse ás continxencias meteorolóxicas que se poidan dar.
