A plataforma Lugo de Cara ao Miño organiza unha nova andaina de custodia e recoñecemento do río e mais as súas ribeiras ao seu paso pola cidade. Desta volta, a cita está prevista para este mércores día 31.
A iniciativa, que se desenvolve por segunda semana consecutiva, terá como punto de encontro o restaurante Los Robles ás 11 da mañá. Na primeira andaina, o colectivo quixo centrarse na supervisión do “estado de saúde” do río na zona comprendida entre a Ponte Romana e a Fábrica da Luz. Na xornada de mañá, o paseo atinxirá a zona das Saamasas e a contorna do clube de piragüismo.
Serán dúas horas de paseo e contacto coa natureza ás que todo o mundo está convidado. A plataforma Lugo de Cara ao Miño cre que é unha boa opción para pasar unha mañá de verán diferente e, ao tempo, produtiva.
