EFE.- A presidenta provincial do Partido Popular, Elena Candia, espera que o goberno bipartito da Deputación de Lugo (PSOE e BNG) faga gala de “proporcionalidade” á hora de acordar a organización de funcións. Lembra que o PP ten os mesmos deputados ca no anterior mandato -doce, a só un da maioría absoluta-, polo que confía en manter, polo menos, os mesmos recursos para realizar o seu traballo na oposición.
Á espera de que sexa convocado formalmente o pleno de organización —que segundo informou o presidente da institución, José Tomé, será o próximo 30 de xullo— , Candia espera a chamada do goberno provincial para “escoitar” a súa “proposta”. En todo caso, pide “coherencia” nesa distribución de recursos que xestionarán todos os grupos, tanto no goberno como na oposición.
Ademais, precisou que no propio pacto de goberno, ambos socios afirman que todos os grupos políticos con representación na corporación provincial disporán dos “medios adecuados” para “facer o seu traballo”. “Nós asistiremos á reunión, cando nos chamen, da forma máis construtiva e positiva posible”, resolveu en declaracións a EFE.
