O grupo municipal do PP presentou este martes 16 as súas propostas de cara ás festas do San Froilán 2019. Lograr unhas celebracións máis inclusivas e con máis apoio ao talento local son algunhas das suxerencias.

A concelleira Beatriz Vázquez deu conta das liñas de traballo polas que avoga o PP de cara á preparación do San Froilán. Pide “recuperar o espírito orixinal” destas festas e atender os intereses de todos os grupos de idade á hora de programar actuacións musicais. Ademais, reclaman que se retome a fórmula de rotación entre os grupos municipais para escoller o pregoeiro.

Entre as súas suxestións tamén está a de traballar pola inclusión, de maneira que se respecten as necesidades das persoas con diversidade funcional. Ofrecer un servizo de cadeiras, dar facilidades para os nenos con autismo ou contratar artistas con algún tipo de discapacidade son algunhas das súas ideas.

Por último, apostan por establecer un escenario permanente no que se lle dea acollida a grupos de música locais. Desa maneira darase a coñecer a “potencialidade” e o talento das bandas lucenses emerxentes.