O goberno local de Lugo vén de constituírse oficialmente este mesmo martes 2 de xullo. O que pasa a ser tenente alcalde do Concello, Rubén Arroxo (BNG), aproveitou para deixar claras as intencións do grupo que lidera: queren “que o Concello se poña a funcionar”.
As concelleiras e concelleiros do BNG incorporáronse hoxe aos labores de goberno municipal, segundo o decreto de adscrición de competencias que se asinou e que lle designa a cada un dos cinco edís electos unha responsabilidade. Nesta data, Rubén Arroxo lembrou o compromiso que manteñen coa cidadanía logo dos comicios do 26 de maio. “O BNG temos a obriga de cumprir o mandato que nos deron os veciños; unha obriga que é a de crear un goberno de cambio que leve adiante a solución a todos eses problemas dos que se leva falando tanto tempo”, aclarou.
Incidiu, tamén, na necesidade de “recuperar o orgullo de ser do Concello de Lugo” e, especialmente, no que fixan como o seu principal obxectivo: “que se poña este concello a funcionar”, logo de pasar “tanto tempo” nunha situación “moi mellorable”.
As persoas do BNG que pasan a formar parte do goberno municipal son: Felipe Rivas, concelleiro de Educación e Difusión do Coñecemento; Cristina López, concelleira de Participación e Servizos para a Veciñanza; Alexandre Penas, edil de infraestruturas; Maite Ferreiro, responsable de Cultura, Turismo e Promoción da Lingua; e o propio Rubén Arroxo, tenente de alcalde e responsable da Área de Infraestruturas e Mobilidade.
