Lara Méndez repetiría como alcaldesa en Lugo con máis votos que nas eleccións de hai catro anos. Así o recolle unha enquisa de Sondaxe publicada por La Voz de Galicia que apunta que o PSdeG sería a forza máis votada na capital provincial co 32,6% dos votos, tres puntos máis que en 2015.

A pesar dese aumento de votos, o PSdeG non aumentaría en concelleiros e obtería os nove de hai catro anos. Tamén o PP mantería os oito concelleiros a pesar de deixar de ser a forza máis votada na cidade e de pasar do 32% dos votos ao 28,4%.

A enquisa de Sondaxe tamén destaca unha suba do BNG e un descenso de Ciudadanos e de Lugonovo. Tamén constata a desaparición de ACE e a aparición no consistorio de En Común, forza na que están Podemos e Anova.