O Bloque Nacionalista Galego en Castro de Rei celebrou este domingo unha concentración fronte ao consultorio de Castro de Rei pola defensa da sanidade pública e a apertura deste centro. Na concentración participou a deputada por Lugo do BNG, Carme Aira, e a portavoz e concelleira local, Digna Lagarón, entre outros integrantes da formación.
“Continuamos a pé de rúa para evidenciar que non queremos que desmantelen o consultorio de Castro de Rei, o BNG e a veciñanza non consente que nos rouben un ben prezado como é a nosa sanidade pública”, afirmou Lagarón. “Grazas ás mobilizacións convocadas polo BNG para recuperar a atención primaria neste concello”, sinalan, a Consellería de Sanidade “reaccionou” con diferentes accións para axilizar o servizo, “pero a realidade é que non existen melloras no funcionamento da atención primaria”.
Por todo isto, o BNG trasladou esta semana ao Parlamento galego, en concreto na Comisión de Sanidade, a reactivación plena do consultorio de Castro de Rei como tamén a dotación de persoal facultativo no centro de Castro Ribeiras de Lea. Estas iniciativas foron aprobadas por unanimidade.
