A cooperativa A Carqueixa, dos Ancares, finalista dos XXI Premios Aresa

Os outros tres proxectos finalistas son EFA Fonteboa, Arnigal Cultivos e a Estratexia de loita ecolóxica fronte a praga da rata topo.

José Antonio Díaz, presidente de A Carqueixa | ALX

O xurado do XXI Premio Aresa de Desenvolvemento Rural deu a coñecer na tarde de hoxe os catro proxectos finalistas desta edición logo dunha reunión na que avaliaron as 16 propostas presentadas. As candidaturas que optan ao galardón son o Centro de Promoción Rural-EFA Fonteboa (Coristanco), Arnigal Cultivos (Santiago), a cooperativa A Carqueixa (Cervantes) e a estratexia de loita ecolóxica contra a praga da rata de Pablo Sánchez Quinteiro.

Neste ano marcado pola Covid-19, o xurado valorou especialmente as iniciativas que redefiniran o seu modelo de negocio durante a pandemia, aquelas que creasen un novo proxecto ou que axudasen a outro, sempre contribuíndo “de maneira decisiva” a crear riqueza no ámbito agrogandeiro.

O gañador do XXI Premio Aresa de Desenvolvemento Rural, dotado cunha placa conmemorativa e 10.000 euros, darase a coñecer o vindeiro 11 de febreiro ás 12:30 h nunha gala que será transmitida por streaming.

OS FINALISTAS

O Centro de Promoción Rural-EFA Fonteboa xorde no ano 1975 como unha iniciativa social para dar resposta ás necesidades de formación do medio rural e desde ese ano leva graduado a uns 1.100 estudantes en Formación Profesional Agraria, a maioría dos cales están incorporados a explotacións agrarias e contribúen no fortalecemento do tecido económico e social dos concellos rurais.

Pola súa parte, Arnigal Cultivos nace da innovación en varias áreas para manter unha produción de Arnica montana constante e necesaria para a súa explotación comercial, pois unha parte importante da flor de árnica utilizada pola industria farmacéutica e cosmética provén da recollida en Galicia. Comezou a súa actividade en febreiro de 2020 coa comercialización dunha gama de tres produtos e coa aposta pola sostibilidade mediante o cultivo ecolóxico, así como a utilización de solventes e tecnoloxías verdes de extracción e a xestión e reutilización de residuos.

O terceiro dos finalistas anunciados esta tarde, Cooperativa A Carqueixa, ten a súa orixe en 1994, ano no que se fundou para a comercialización conxunta de xatos e a compra de insumos, adquirir máis dimensión como colectivo e conseguir que os produtores de carne de Cervantes fosen un sector máis forte e cohesionado. A día de hoxe está formada por uns 200 cooperativistas.

Por último, o proxecto `Estratexia de loita ecolóxica fronte a praga da rata topo´, presentado por Pablo Sánchez Quinteiro, pretende aportar a experiencia dos membros do grupo de Neuroanatomía do departamento de Anatomía da Facultade de Veterinaria da USC no estudio da comunicación química dos mamíferos para o desenvolvemento dunha estratexia de control para este tipo de praga basándose na utilización de sinais químicas producidas pola propia rata topo (feromonas) e polos seus depredadores, fundamentalmente o raposo (cairomonas), nas zonas afectadas.

DEIXAR UN COMENTARIO

Please enter your comment!
Please enter your name here