A Fiscalía pide 16 anos de cárcere a un home acusado de agredir sexualmente a unha menor, ameazala cunha pistola e retela ilegalmente no seu coche en Lugo entre os anos 2015 e 2016. A Audiencia Provincial retomará este mércores a vista oral.

Segundo o escrito do Ministerio Público, recollido por Europa Press, o procesado coñeceu á vítima no outono do 2014, cando ambos foron a un hotel nas proximidades da cidade de Lugo para consumir cocaína e cannabis e manter relacións sexuais co consentimento da moza. No entanto, o acusado prometéralle unha suma de diñeiro que logo non recibía ou recibía unha cantidade inferior.

A finais de 2015, volveron ao hotel e “dunha forma inesperada”, relata Fiscalía, o procesado “levou a cabo penetración pola vía anal” sen que a menor o consentira. El “non fixo caso” das súas peticións e “suxeitouna con forza” ata o final do acto sexual.

Tras este suceso, a moza non acudiu ao médico nin contou o sucedido á súa nai, quen chegou a ter noticia do sucedido “en principio a través de terceira persoa”, segundo o escrito.

RETENCIÓN ILEGAL

Xa en marzo do 2016, o acusado conducía o seu coche por unha rúa perpendicular a Camiño Real, en Lugo, e viu como a vítima pasaba como peón. Nese momento, de acordo coa versión do Ministerio Público, empuñou unha pistola e díxolle: “Sobe ao puto coche“.

A menor montou no vehículo, que circulou por varias rúas da cidade en compañía do procesado. Finalmente, logrou escapar cando el se baixou do automóbil e entrou nun establecemento. Ao parecer, esta retención duns 15 minutos de duración debeuse a que o acusado quería “reprochar” á vítima que comentase o ocorrido a outras persoas.

Por todos os feitos narrados, a Fiscalía solicita para o acusado unha pena de 13 anos de prisión por un delito contra a liberdade sexual, ademais doutros 3 anos por detención ilegal. Do mesmo xeito, solicita impor ao procesado a prohibición de achegarse a menos de 200 metros da vítima e do seu domicilio e de comunicarse con ela durante 10 anos de calquera forma.