O grupo municipal do PP denuncia o estado no que se atopan as vías de servizo da estrada LU-12, “practicamente cubertas pola maleza“. Onde antes pasaban dous vehículos sen problemas, agora só pode pasar un, aseguran os populares. Critican que en Lugo se fai unha “limpeza selectiva” da rede de estradas e cualifican esas actuacións como “desbroces a ritmo de verbena”.
O concelleiro popular, Manuel López, explicou que a limpeza e mantemento desta vía é competencia estatal, pero pensa que dende o Concello deberían meterlle présa a Fomento. “Falamos do mellor acceso que teñen os veciños de Piugos e parroquias da contorna ás suas vivendas dende a estrada de Santiago”, así que ven a situación como un exemplo de “deixamento” do goberno central con Lugo.
Este problema esténdese, di o PP, a todas as parroquias do rural debido a non contar cun plan específico para isto. Lamentan que o goberno opte por unha “limpeza selectiva”, o que eles denominan “desbroces a ritmo de verbena”: segundo eles, só se roza nos días previos ás festas desas parroquias.
Así mesmo, López afirma que dende o PP xa puxeron enriba da mesa a necesidade de rozar varias fincas do Concello de Lugo para cumprir coa lei de prevención de incendios. “O goberno local non fai nada por limpar a maleza” e iso “pode ocasioanar graves problemas para os lucenses”.
