O Concello de Guntín celebra este domingo 12 de agosto a XIV Festa artesanal de Ferreira de Pallares. A cita servirá para reunir a unha ducia de artesáns da provincia de Lugo e as rexións limítrofes, cunha representación dos expertos en oficios tradicionais do noroeste peninsular. Será un evento de gran magnitude para esta parroquia, de apenas 130 habitantes. 

Con organización a cargo da Asociación de Amigos do Mosteiro de Ferreira de Pallares e mailo propio Concello de Guntín, a feira conta coa aportación de 3.000 euros da Deputación de Lugo. O goberno provincial é o principal patrocinador tanto da Festa Artesanal de Ferreira de Pallares coma do Certame de Investigación Condado de Pallares. O pregón corresponderá a Raquel Gandoy, xornalista da Televisión de Galicia.

Como en ocasións anteriores, a décimo cuarta edición irá alén da festividade. A Festa é unha reivindicación do legado do Condado de Pallares, reforzando a identidade do lugar a través dos oficios que protagonizaban a economía local ata non hai moito. Ferreira de Pallares septuplicará a súa poboación durante a xornada, o que suporá un importante pulo económico e a oportunidade de espallar a cultura de seu.

Así, propios e alleos poderán desfrutar das demostracións artesanais e da degustación de produtos tradicionais. Xunto coa sobranceira calidade que ofrece a feira, quenes se acheguen a Guntín poderán participar do xantar de confraternidade, que recobra o espírito das romarías. Todo, co acompañamento das actuacións musicais ao longo de todo o día.

A Festa Artesanal de Ferreira de Pallares terá lugar na contorna do Mosteiro homónimo. Difícil escoller mellor lugar para rescatar as tradicións que canda este excepcional patrimonio histórico, esquecido malia a súa proximidade á capital da provincia.

O Programa

A Feira artesanal de Ferreira de Pallares, que terá lugar o día 12 nas inmediacións do Mosteiro de Ferreira de Pallares, reunirá este ano a máis de 15 artesáns, que ensinarán aos visitantes da feira a súa labor de cantería, olaría, apicultura, cestaría, ferrería ou encaixe. Ademais, durante todo o día sucederanse diversas actuacións musicais. O programa completo é o seguinte:

– Ás 9:00 horas: os artesáns comezarán a montar os seus postos.

– Ás 11:00 horas: apertura do recinto feiral.

– Ás 13:00 horas: degustación de filloas.

– Ás 13:15 horas: Pregón a cargo de Raquel Gandoy, xornalista da TVG.

– Ás 13:45 horas: Misa solemne.

– Ás 14:45 horas: Xantar de confraternidade.