O BNG xa enfía con forza a carreira cara ás vindeiras eleccións municipais de maio de 2027. A portavoz nacional da formación, Ana Pontón, presentou este mércores nun acto público a Rubén Arroxo como candidato á Alcaldía de Lugo, vaticinando con total convicción que o Bloque “fará historia” e abrirá un “tempo novo de optimismo e ambición” na cidade.
UN “TÁNDEM GAÑADOR” PARA CONSTRUÍR UN LUGO GRANDE
Pontón asegurou que a organización está plenamente preparada para asumir o liderado do goberno local porque conta cun “tándem gañador” e un candidato con capacidade contrastada. “Temos ao mellor candidato e o mellor proxecto, por iso imos a por todas, con humildade pero tamén coa máxima ambición”, insistiu a líder nacionalista, quen augurou que dentro de once meses a cidadanía “demostrará a súa dignidade” apostando de forma clara por Arroxo.
ESTABILIDADE FRONTE AO “CAOS” DE QUEN MARCHOU A SANTIAGO
Durante o seu discurso, a voceira do Bloque puxo en valor a “estabilidade, seriedade e rigor” que o BNG achegou á xestión da cidade amurallada durante este mandato, definíndoo coma un exemplo de compromiso rotundo coa veciñanza.Para rematar, aproveitou para lanzar unha dura crítica velada á exalcaldesa socialista Lara Méndez, afeando a actitude de quen se presentou ás eleccións e, ao cabo duns meses, “marchou cara a Santiago, deixando un caos no seu partido que acabou como acabou”.
