Segundo informa a Policía Local nun comunicado, un cidadán alertou ao 092 de que un grupo de persoas estaba a extraer tramos de cable de cobre e cargándoos nunha furgoneta. Os axentes localizaron dous dos implicados manipulando unha arqueta na intersección da Rolda da Muralla coa rúa Castelao.
Ao ser interrogados, “ofreceron versións contraditorias sobre a natureza do seu traballo, e un deles recoñeceu non dispor de documentación e atoparse en situación irregular”. O número de teléfono do seu suposto empregador resultou inexistente ao ser comprobado.
Mentres falaban cos axentes, un dos detidos enviou unha mensaxe alertando a un terceiro no que dicía “pilláronnos”.
Foron intervidas ferramentas como uns cascos de obra, un desaparafusador, unha folla de serra e outros útiles. Ambos foron detidos por presunta subtracción de cableado de infraestrutura pública e trasladados a dependencias policiais para a instrución das dilixencias.
FURTO DE PEZAS DUN BANCO DANADO
Por outra banda, un home foi interceptado mentres trataba de levar á súa leira as pezas de ferro dun banco municipal danado.
Un cidadán alertou de que un home estaba a desmontar as partes de forxa dun banco público na glorieta da avenida de Garabolos. Á chegada dos axentes, “o home recoñeceu sen reviravoltas que pensaba cargar as pezas no seu vehículo para instalalas na súa leira”, pois o banco “estaba tirado na rúa”. As pezas de forxa foron trasladadas a dependencias policiais para a súa custodia.
