Medio centenar de traballadores de banca participou este xoves na cidade de Lugo na xornada de mobilizacións pola “recuperación salarial, contra a presión comercial e a subida dos obxectivos no sector”. Así protestaron, tras a convocatoria de CIG-Banca que escolleu este lema, ante as sedes de distintas oficinas bancarias na cidade de Lugo, tanto de dentro de murallas como de fóra.
A delegada de CIG, Paula Mosquera, explicou que o que reivindican é “que a presión comercial se modere porque cada vez temos máis presión, os convenios non fixan cláusulas de revisión, sobe o IPC e non revisan os salarios a pesar de que os beneficios son maiores”.
Paula Mosquera, ademais de participar nas protestas na mañá deste xoves, acudiu a un xulgado do Social, ao número dous de Lugo, por unha denuncia interposta por ela mesma contra a oficina de Abanca no municipio da Pobra do Brollón, onde traballa.
Ela pedira unha “adaptación da xornada” que a permita conciliar, ten un fillo pequeno, e “non ter que reducir xornada ou reducir soldo” dado que precisamente a redución de xornada supúxolle “reducir” o salario.
“Pido adaptar a xornada de maneira que poida cambiar e cumprir co meu traballo. Eu traballo na oficina, atendo o público. Ábrese ás 8,00, aínda que ao público ás 8,15 (da mañá), pechamos a porta ás 14,15 aínda que saímos ás 14,30. Eu o único que solicitou é non ter que traballar as dúas tardes que temos a cambio de facer unha hora máis, de dúas e media a tres e media (da tarde)”, precisou.
Tras o xuízo, no Xulgado do Social de Lugo, esta traballadora sinalou que cre que “saíu ben”.
