A Deputación de Lugo alberga dende este mércores o Congreso Internacional de Arqueoloxía do Ouro, o primeiro evento desta categoría arredor da ourivaría antiga que se celebra en Galicia. Á conferencia inaugural das 19.00 horas seguirán outros dous días de simposio, cun éxito total de asistencia, pois as 140 prazas foron cubertas.
O Congreso, patrocinado pola autoridade provincial, está enmarcado no Ano Europeo do Patrimonio Cultural, baixo o lema O noso patrimonio, onde o pasado atópase co futuro. Dende a Deputación agardan que a cita contribúa a espallar e pór en valor os recursos arqueolóxicos e patrimoniais da provincia, elementos entre os que a ourivaría antiga é fonte de información e documentación, como manifesta a importante colección do Museo Provincial de Lugo.
Entre outros aspectos, os convidados de sona internacional tratarán en dezasete relatorios a paisaxe aurífera, a circulación do ouro, a tecnoloxía empregada na ourivaría antiga, e o papel deste metal na sociedade pasada e actual. A conferencia inaugural corresponde ao ourensán Marcos Martinón-Torres, con O ouro de El Dorado: verdades e mentiras sobre unha historia lendaria. Este investigador, autor de 120 publicacións e con experiencia en varios continentes –entre outros estudos, o Exército de Terracota de China e o ouro precolombino en Sudamérica–, asumiu recentemente a Cátedra Pitt-Rivers de Ciencia Arqueolóxica na Universidade de Cambridge.
Catro sesións temáticas
1. Terra Auris: paisaxe aurífera e circulación do ouro. Estudos de minería e xeoquímica para o estudo das procedencias e a circulación do ouro. Xeografía dos achados de ourivería, dispersión dos metais e das pezas. Recursos e explotacións mineiras. Presenta e modera Marcos Martinón-Torres.
2. Tecnoloxía da ourivería antiga. Estudo da ourivería antiga e dos diferentes ámbitos tecnolóxico nos que se insire. Metodoloxías analíticas, resultados e novidades na investigación científica. Coordina Xosé Lois Armada.
3. O ouro e os sentidos. A ourivaría como símbolo, relacións de identidade, xénero, poder/prestixio. Simbolismos e significados. Presentación e moderación corresponden a Aurelia Balseiro.
4. A ourivería antiga na sociedade actual. Estudos e investigación no campo das relacións interdisciplinarias dende a etnoarqueoloxía, antropoloxía, museoloxía, percepción do ouro nas sociedades antigas e modernas e construción de identidades narrativas arredor da ourivaría. A cargo estará Beatriz Comendador.
