Uns cen veciños do centro urbano da capital municipal de Baralla, así coma outros moitos doutras zonas da Montaña lucense, non poden acceder a servizos como conexión a Internet ou teléfono fixo porque “non hai liñas suficientes para ofrecer” esa conectividad, segundo denuncia o Partido Socialista.

O portavoz socialista, Jaime González, explicou que “existen zonas onde non se pode ter un servizo de internet por cable“, o que, por outra banda, “impide aos usuarios cambiar de compañía por medo a perder o acceso” que xa teñen contratado.

Esa situación provoca “un monopolio” por parte dunha operadora concreta e obriga mesmo aos veciños dese municipio da Montaña de Lugo a contratar “servizos que non desexan, por exemplo a televisión” de pago, para “poder acceder a tarifas planas de móbiles”.

González lembrou que a situación é “tan grave” que a deputada Concepción Burgo xa presentou varias iniciativas no Parlamento de Galicia para esixirlle á Xunta que adopte algún tipo de decisión respecto diso. O portavoz socialista lembra que se trata dunha situación que está a limitar incluso a creación de tecido empresarial no municipio.