O mozo de Castro de Rei que resultou ferido o pasado venres durante o Rally San Froilán permanece ingresado en estado grave na unidade de coidados intensivos (UCI) do Hospital Universitario Lucus Augusti (HULA), en Lugo. Segundo fontes hospitalarias, o seu estado mantense estable dentro da gravidade.
O accidente tivo lugar ao redor das 19,30 horas do venres 16 de outubro no municipio lucense de Outeiro de Rei, por onde transcorría un dos tramos da proba automobilística. Un dos vehículos participantes perdeu unha roda, que saíu despedida e impactou contra varios espectadores.
Como consecuencia do suceso, tres persoas resultaron feridas. O mozo de Castro de Rei foi o único que necesitou traslado hospitalario, do que se encargou a organización do evento. Tamén foron avisados a Garda Civil e os servizos sanitarios do 061.
