A Policía Local de Lugo interveu este mércores nunha agresión con allanamento de morada. Detivo unha muller que agrediu outra tras acceder pola forza á súa casa. Segundo detallan nun comunicado, ás 17.10 horas recibiron chamadas telefónicas que alertaban de ruídos de discusión e pelexa. Os axentes foron informados no lugar de que, instantes antes, unha muller chamara á porta e, despois de abrírenlla, entrara pola forza no domicilio e agredira unha muller que se atopaba no interior.
Achegouse ademais unha descrición física, xa que nese momento se ausentara, polo que non foi posible localizala de inmediato. Aproximadamente unha hora e media despois, recibiron un novo aviso, xa que viran a mesma muller intentando acceder de novo ao edificio. Os axentes desprazáronse ao lugar de inmediato e localizaron a muller na escaleira, mentres ameazaba a presunta agredida. Procederon entón á detención da muller e ao seu traslado a dependencias policiais, non sen antes ser conducida a un centro sanitario, polo estado de axitación que presentaba.
