O home detido durante o fin de semana en Lugo tras ser localizado en plena rúa cun coitelo de cociña de case 20 centímetros de folla e parte da roupa ensanguentada quedou en liberdade este luns despois de recuperarse deste episodio.
O arresto produciuse o sábado pola noite na Rúa Santiago, onde axentes da Policía Local tiveron que intervir para reducir ao home, duns 30 anos e de procedencia estranxeira, que se atopaba moi alterado e baixo os efectos de sustancias estupefacientes.
O detido levaba consigo un coitelo de cociña cunha folla de case 20 centímetros e presentaba restos de sangue tanto na roupa como na arma branca. As pescudas posteriores permitiron determinar que todo o sangue era do propio arrestado, que se atopaba ferido, e que non correspondía a ningunha outra persoa.
Durante o incidente, o home chegou a ameazar a berros a varios veciños. No entanto, segundo as primeiras comprobacións, as súas expresións non tiveron tinguiduras racistas nin contiñan ofensas de carácter discriminatorio ou intimidatorio.
Tras a súa detención, foi trasladado a dependencias da Policía Nacional, onde prestou declaración asistido por un avogado. Inicialmente, contemplábase a súa posta a disposición xudicial por posibles delitos de desordes públicas e ameazas, pero o home non chegou ao xulgado, xa que, unha vez que recuperou a normalidade e tras completarse as actuacións policiais, quedou en liberdade.
