A deputada socialista Carmen Rodríguez Dacosta criticou este mércores á Xunta por, segundo dixo, “non destinar ás provincias de Lugo e Ourense nin un só euro do Fondo de Compensación Interterritorial durante catro anos consecutivos”.
Dacosta referiuse, nunha pregunta no Pleno do Parlamento, ao informe do Consello de Contas do período 2022-2025, no que Galicia “contou con máis de 155 millóns de euros procedentes do Estado” dentro do FCI.
“Falamos de cohesión, igualdade de oportunidades e do futuro de dúas provincias que levan demasiado tempo reclamando investimentos para superar as súas dificultades económicas e demográficas”, dixo, criticando que “o 100% desas asignacións desviásense a Pontevedra, fundamentalmente á ampliación do Hospital Montecelo, que xa estaba comprometido nos Orzamentos da Xunta e contaba con financiamento estatal e europeo”.
Na súa quenda de intervención, o conselleiro de Facenda, Miguel Corgos, asegurou que esta afirmación “non é certa”, e criticou a “escasa dotación” do FCI, lembrando que en Galicia a súa programación faise “de forma conxunta” co fondo propio da comunidade autónoma, “moito máis cuantioso”.
“Non ten sentido facer unha análise illado só para o FCI do destino territorial do investimento, pola súa escasa masa crítica”, dixo Corgos, e “aínda ten menos sentido facer esta análise en base á presupuestación inicial e non á certificación final”
O conselleiro asegurou que, se se teñen en conta datos de “execución final”, pódese “apreciar como todos os anos execútanse partidas en todo o territorio galego”.
