A Sala do Civil e Penal do Tribunal Superior de Xustiza de Galicia (TSXG) ratifica a sentenza de absolución da sección segunda da Audiencia Provincial de Lugo a un home acusado de agredir sexualmente a un menor, que tiña 15 anos durante os feitos, ao que coñeceu nunha aplicación de citas.
O investigado e o denunciante mantiveron varios encontros de carácter sexual en Lugo tras ter conversacións a través do móbil, despois de coñecerse nunha aplicación de citas na que o menor facía constar no seu perfil que tiña 18 anos. Así, descarta o recurso e avala o fallo que fixaba que “non pode concluírse que o acusado coñecese a idade exacta do menor nin que puidese albergar dúbidas sobre a mesma”.
“Non hai dúbida algunha na Sala senón o convencemento que nin coñecía, nin tiña motivos para dubidar de que así fóra, de que a persoa coa que mantivo os contactos sexuais tiña menos de 16 anos no momento en que estes tiveron lugar”, sostén o TSXG neste novo fallo que avala o previo da Audiencia de Lugo. Contra esta sentenza cabe presentar recurso de apelación ante o Tribunal Supremo.
