Axentes da Policía Nacional de Lugo detiveron a un home como suposto autor de dous roubos con forza en establecementos comerciais da cidade, tras o que pasou a disposición xudicial.
Así mesmo os axentes da Comisaría Provincial de Lugo esclareceron tamén dous feitos delituosos diferentes ao nomeado, consistentes en furto de efectos persoais e posteriores estafas con tarxetas de crédito subtraídas, cometido polo denominado método de “la siembra”.
Os autores desta modalidade delituosa adoitan actuar de forma itinerante, o cal dificultaba a identificación do mesmo, aínda que neste caso resultaron positivas as xestións dos axentes.
Nestes dous casos esclarecidos, os feitos cométense na zona de cobranza e no aparcadoiro de establecementos comerciais, xeralmente supermercados. Actúan dúas persoas de forma coordinada. Unha delas vixía na zona de caixas aos clientes, tentando visualizar o código “pin” das tarxetas de crédito coas que se fan os pagos. Unha vez determinada a vítima, dáse aviso á outra persoa, que espera no aparcadoiro para distraela cando estea no vehículo.
Con esta distracción, a persoa que vixiaba na zona de caixa acode ao aparcadoiro e aproveita para subtraer os efectos persoais da vítima, con especial interese na tarxeta de crédito da que acaban de observar o número PIN.
Para finalizar, acoden o máis axiña posible para realizar extraccións de diñeiro no caixeiro máis próximo, e acto seguido abandonar o municipio.
Denomínase método de “la siembra” porque os autores “siembran” unha distracción para que a vítima baixe a garda e sexa máis fácil roubarlle, tal como finxir que se lles caeu algo ao solo, pedirlle axuda para ler un papel ou preguntar por algunha localización, entre outros.
