A sección segunda da Audiencia Provincial de Lugo absolveu a un home acusado de agredir sexualmente a un menor de 16 anos, ao que coñeceu nunha aplicación de citas.
O investigado e o denunciante mantiveron varios encontros de carácter sexual tras manter conversacións a través do móbil, despois de coñecerse nunha aplicación de citas na que o menor facía constar no seu perfil que tiña 18 anos, segundo recolle a sentenza.
O tribunal, segundo o fallo difundido polo Tribunal Superior de Xustiza de Galicia (TSXG), indica que “non pode concluírse que o acusado coñecese a idade exacta do menor nin que puidese albergar dúbidas sobre a mesma”.
E, en todo caso, agrega que non hai indicios de que “este puidese supor que o neno non cumpría coa idade límite do tipo penal, isto é, 16 anos”.
Por ese motivo, procede á absolución do acusado. A sentenza non é firme, xa que é recurrible ante o TSXG.
