Un camión sufriu un incendio este xoves mentres circulaba pola A-6, no quilómetro 445, á altura das Nogais, o que obrigou a cortar un carril da autovía, segundo informou o 112 Galicia. A Central de Emerxencias recibiu o aviso arredor das 8.35 horas, cando un particular alertou de que había un vehículo pesado avariado que comezara a arder. O alertante intentou apagar o lume cun extintor, pero non o conseguiu.
Ata o lugar mobilizáronse os bombeiros de Sarria, ademais de axentes da Garda Civil e servizos de mantemento da vía. Como consecuencia do incendio, a cabina e o remolque do camión quedaron completamente calcinados, aínda que non transcenderon danos persoais. O operativo centrouse en controlar as lapas e garantir a seguridade na circulación mentres se realizaban os labores de extinción e retirada do vehículo.
