Unha muller resultou ferida e acabou atrapada tras envorcar o seu coche no municipio lucnese de Guntín.
Segundo informou o 112, o accidente tivo lugar na LU-P-1611, á altura do quilómetro 31, ao seu paso pola parroquia de Vilameá.
O aviso chegou ás 16.20 horas a través do sistema eCall do propio coche accidentado. Os xestores da central puideron contactar coa condutora, que confirmaba que se atopaba atrapada no interior do vehículo.
Pouco despois, varias persoas que circulaban pola zona tamén chamaron ao número de emerxencias para alertar do accidente e informaron de que o coche estaba envorcado.
Desde a sala de operacións do 112 Galicia activouse un dispositivo de intervención no que participaron Urxencias Sanitarias de Galicia-061, o GES de Friol-Pas, os Bombeiros de Chantada e axentes da Garda Civil de Tráfico.
Os equipos de emerxencia tiveron que empregar material de excarceración para liberar á vítima, que foi evacuada nunha ambulancia en estado semiconsciente.
