O Grupo Municipal do Partido Popular no Concello de Lugo solicitou ao goberno local, formado por PSOE e BNG, que amplíe o prazo de presentación de alegacións ao Plan de Mobilidade Urbana Sustentable (PMUS). A portavoz municipal, Elena Candia, reclamou unha prórroga de dez días hábiles co obxectivo de que os veciños e colectivos poidan estudar con detalle un documento que condicionará o futuro da cidade.
Tras celebrar sete reunións informativas en diferentes barrios, o PP asegura detectar un elevado interese, pero tamén “inquietude e malestar” polas consecuencias do plan no comercio e na circulación. Candia cualificou o PMUS como un texto “amplo e complexo” que expón cambios relevantes en tráfico, transporte público e estacionamento, polo que considera que o prazo actual é insuficiente para unha análise profunda.
Entre as “incoherencias” detectadas polos populares, destacan a proposta de peonalizar a rúa Doutor Ochoa, vía de acceso ao PAC da Residencia, o que podería afectar á rapidez dos servizos de emerxencia. Así mesmo, o PP sinala que, malia as matizacións do goberno, algunhas actuacións como as de Camiño Real ou Tino Grandío xa están moi avanzadas. O grupo continuará coas súas reunións informativas este luns en San Roque e mañá cos servizos de emerxencias.
