A Policía Local de Lugo identificou e denunciou a catro individuos que exercían de gorrillas —axudando a aparcar e pedindo cartos a cambio– nas inmediacións do Hospital Universitario Lucus Augusti (HULA).
Segundo relatou a Policía Local, durante a mañá deste pasado luns, 17 de xaneiro, axentes da Unidade Territorial de Policía de Barrio, tras varias chamadas que avisaban da existencia de gorrillas nas inmediacións do HULA, localizaron a catro individuos que indicaban aos condutores os espazos libres para estacionar “co risco que leva a ocupación da calzada por parte dos peóns”.
Por iso, eses individuos foron identificados e denunciados por estes feitos e os policías requiríronlles que cesasen nesa actividade, sinalaron as mesmas fontes. Ademais, un deles foi denunciado por infracción á Lei de Protección da Seguridade Cidadá por desobediencia aos axentes da autoridade, porque inicialmente fixo caso omiso, destaca a Policía Local, e seguiu “transitando pola calzada entre os vehículos”, aínda que finalmente ausentouse do lugar.