A Audiencia Provincial de Lugo xulgará o vindeiro xoves, día 18, a un home acusado de abusar sexualmente de maneira repetida da súa filla discapacitada, da que tiña a patria potestade. Fiscalía pide para el nove anos de cárcere.
Segundo o escrito do ministerio público, o home convivía na provincia de Lugo xunto á súa filla e a súa esposa, ambas as dúas discapacitadas. En datas non determinadas, pero “en múltiples ocasións” desde a maioría de idade da vítima, o acusado abusou sexualmente dela aproveitándose da súa superioridade como pai e da discapacidade da moza.
O 23 de xaneiro de 2018, mentres estaban no domicilio familiar, o home volveu violar á súa filla, que conseguiu escapar do domicilio e pedir axuda a un familiar.
O fiscal considera os feitos constitutivos dun delito de abusos sexuais continuados con prevalemento dunha relación de parentesco, polo que pide para o acusado nove anos de cárcere e 16 de afastamento da súa vítima, así como unha liberdade vixiada durante oito anos tras a condena. Finalmente, reclama que abone ao Sergas gastos sanitarios e unha indemnización de 3.000 euros para a moza.
