Axentes da Policía Nacional da Comisaría de Lugo detiveron un home de 40 anos, sobre o que xa constaban unha trintena de detencións previas, que tentou fuxir no seu coche despois de que os veciños o interceptaran mentres roubaba ferramentas nun garaxe.

Os feitos, segundo informa o corpo de seguridade, ocorreron este domingo, cando residentes da zona se puxeron en contacto coa sala do 091 para avisar de que un home estaba a sacar cousas dun garaxe. Os veciños e a propietaria do inmoble lograron retelo uns instantes, pero o home forcexeou con eles e conseguiu introducirse no seu turismo para saír do lugar a gran velocidade.

Deste xeito, os axentes chegaron ao lugar e, tras ser informados do ocorrido, comunicaron os feitos ao resto de radiopatrullas en servizo para activar un dispositivo para localizar o presunto autor do roubo e a outro ocupante do vehículo. Ambos foran fotografados polos alí presentes.

Momentos despois, unha dotación logrou avistar o coche desde un punto alto e procedeuse a súa interceptación. Atopábanse nunha leira nas inmediacións do río, onde descargaban a mercadoría subtraída no roubo que acababan de perpetrar.

O botín, que foi incautado polos axentes, consistía en diferente material de traballo, como motoserras e cortasebes. A Policía Nacional trasladou estes elementos e ao detido ás súas dependencias na rúa Chantada, onde se elaborou o correspondente atestado para ser remitido ao Xulgado de garda ao longo da mañá deste luns.