A Garda Civil detivo na madrugada deste xoves en Rábade un veciño de Portomarín de 21 anos de idade como presunto autor dun delito de roubo con forza por subtraer lotaría e tabaco nun albergue.

O rapaz foi interceptado nun control preventivo na estrada LU-111 e os axentes procederon á súa identificación porque non respectaba o toque de queda. Comprobaron que no seu poder levaba varios décimos de lotaría e numerosos paquetes de tabaco de diferentes marcas, das cales non xustificou a súa procedencia, segundo sinalaron fontes da Benemérita.

Por iso, iniciouse unha investigación e verificouse que os décimos de lotaría e o tabaco foran subtraídos nun albergue o pasado mes de outubro. A persoa detida en relación con estes feitos foi posta a disposición xudicial.