O condutor dun vehículo que circulaba por Outeiro de Rei (Lugo) resultou ferido despois de caer por un terraplén e chocar contra un muro ao tratar de esquivar dous cans que cruzaban a estrada.
O suceso produciuse sobre as 02,45 horas desta madrugada de sábado na vía LU-115, á altura da parroquia de Arcos. Alí foi onde o home tivo o accidente e chamou aos servizos de emerxencias do 112-Galicia. Na súa chamada, o condutor explicou que tivo que saír do turismo polo teito solar e solicitaba asistencia sanitaria debido á intensidade do golpe.
Tras este aviso, o Centro Integrado de Atención ás Emerxencias (CIAE) puxo os feitos en coñecemento dos profesionais de Urxencias Sanitarias de Galicia 061, da Garda Civil, os Bombeiros de Vilalba e o servizo de mantemento da vía para asistir ao home.
