Unha muller de 84 anos tivo que ser evacuada da súa vivenda en Cospeito na tarde deste venres debido a un incendio que terminou por calcinar o inmoble por completo. Segundo informa o 112, foron varios particulares os que deron a alerta sobre as 17,45 horas da tarde acerca dun lume declarado nunha casa da rúa Moinelos, na parroquia de Xustás.

O incendio, engade a central de emerxencias, quedou sufocado ao redor das 3,00 horas. Con todo, os servizos de extinción advertiron que a vivenda aínda pode humear durante uns días debido ás elevadas temperaturas alcanzadas.

Segundo indican fontes do 061-Urxencias Sanitarias, ata o lugar desprazouse unha ambulancia con base en Vilalba para asistir á octoxenaria e trasladala ao PAC do municipio veciño. Máis tarde foi trasladada ao Hospital Lucus Augusti de Lugo. Ademais dos efectivos sanitarios desprazáronse ata o lugar os bombeiros de Vilalba e axentes da Garda Civil.