A Deputación de Lugo informou de que desde este luns, 7 de setembro, e ata o venres 18 permanecerá cortado un tramo da estrada provincial LU-P-2604, que comunica Xove con Valcarría. Segundo trasladou o Goberno provincial nun comunicado, a restrición afectará desde o inicio da vía ata o punto quilométrico 0,900. O corte é necesario para acometer os traballos de fresado e asfaltado da estrada, polo que durante estes días será preciso manter libre de vehículos toda a zona afectada. A Deputación pide así que non se estacione ningún vehículo no tramo incluído nas obras, co obxectivo de facilitar o desenvolvemento dos traballos e evitar incidencias.
As actuacións serán executadas pola empresa José Non Mantiñán e Fillos Construcións, S.A. Os traballos forman parte dun proxecto máis amplo de mellora e acondicionamento de varias estradas provinciais no municipio de Xove, cun investimento total que supera os 800.000 euros. A intervención na LU-P-2604 prolongarase, en principio, durante case dúas semanas, polo que a Deputación recomenda á veciñanza e aos condutores ter en conta a restrición á hora de planificar os seus desprazamentos.
