Un dispositivo da Deputación de Lugo, composto por 16 máquinas quitaneves, 8 vehículos de apoio e 48 operarios, traballa este domingo en despexar a neve e garantir a circulación nas estradas da montaña da provincia.
Os labores, que se iniciaron días atrás, céntranse especialmente nos municipios con cotas máis altas, onde se manteñen acumulacións de xeo de ata 5 centímetros e onde a alerta amarela seguirá vixente durante a xornada, segundo informa a Axencia Estatal de Meteoroloxía (Aemet).
En total, a montaña de Lugo abrangue 180 estradas provinciais que suman 1.000 quilómetros en municipios como Baleira, Baralla, Becerreá, Cervantes, A Fonsagrada, Folgoso do Courel, O Incio, Navia de Suarna, Negueira de Muñiz, As Nogais, Pedrafita do Cebreiro, Ribeira de Piquín, Samos e Triacastela. A Deputación chama á precaución á hora de circular, especialmente a partir do mediodía, cando se espera que as condicións empeoren.
