A Xunta deu luz verde este martes á “declaración de incidencia ambiental de actividade” para un proxecto de legalización, reforma e ampliación dunha instalación existente de recollida e albergue de animais de compañía en Lugo. O proxecto está impulsado pola Sociedade Protectora de Animais e Plantas lucense e, segundo informa a Consellería de Medio Ambiente, poderá desenvolverse “se se cumpren as medidas correctoras” recollidas pola resolución da administración autonómica. Tal e como trasladou a Xunta nunha nota de prensa, unha vez analizada a documentación recibida, o procedemento foi “legalizar ambientalmente o proxecto básico e de ampliación de actividade do albergue”, que está en Piñeiro, na parroquia de Santa María de Muxa.
SEN IMPACTOS SIGNIFICATIVOS
Nesta liña, incidiu en que “non se prevé que a iniciativa teña impactos significativos sobre os arredores, sempre que se cumpran as condicións fixadas na propia resolución autonómica”. Así mesmo, afirmou que a declaración de incidencia ambiental foi elaborada “segundo o procedemento establecido e con consulta a seis administracións”, as cales “emitiron informes e estableceron unha serie de medidas correctoras”. Con todo, relatou que que os organismos consultados “consideran que o proxecto non terá impactos significativos nos distintos eixos analizados”, e que a posta en marcha do plan sería viable “sempre que se cumpra cos condicionantes establecidos nos seus respectivos informes”.
