O Eixo Atlántico celebrou unha nova reunión da súa Comisión Executiva este xoves en Lugo. Con este motivo, inaugurouse unha praza co nome da entidade transfronteiriza.
A alcaldesa de Santiago, Goretti Sanmartín, que participou na reunión, tamén estivo presente na inauguración da praza, a sexta da entidade e a primeira en Galicia –aprobada no contexto da Capital da Cultura 2023– súmase á de Bragança, Matosinhos, Braga, Vila Nova de Gaia e Viana do Castelo.
Segundo sinalan nun comunicado, trátase dun recoñecemento “non só á historia da entidade”, senón que ademais representa un “símbolo de punto de encontro das entidades galegas e portuguesas”.
A escultura que preside a praza é un cilindro iluminativo no que aparecen representados os 41 municipios e deputacións que integran o Eixo Atlántico.
Tras a inauguración do novo espazo, a comisión reuniuse no edificio Impulso Verde para analizar a sitaución e evolución das infraestruturas, así como dos principais proxectos en curso da entidade.
Entre os acordos tomados, a comisión ratificou a proposta do Grupo Temático de Turismo para que Sarra sexa, en maio de 2025, a sede do VIII Expocidades, a feira de turismo de proximidade.
Así mesmo, o Grupo Temático de Educación e Cultura aprobou que Viana do Castelo sexa a Capital da Cultura 2025. Durante 10 meses, de xaneiro a outubro, organizaranse 64 grandes eventos de todas as disciplinas: cultura urbana, música, literatura, gastronomía, cinema e arquitectura, entre outras.
Finalmente, a Comisión Executiva aprobou a proposta do Grupo Temático de Deportes para organizar en Valongo, en outubro, un seminario de intercambio de experiencias sobre a igualdade de xénero no deporte.
No que respecta ás infraestruturas, verificouse o compromiso do Goberno de Portugal de “manter o calendario” da liña Lisboa-A Coruña, tal e como foi aprobado pola Asemblea dá República.
