InicioSociedadeA Fiscalía pide dous anos e medio de cárcere para un preso...

A Fiscalía pide dous anos e medio de cárcere para un preso de Bonxe por agredir a un funcionario que lle pediu usar a máscara

A defensa denuncia na vista a "desproporción" da pena solicitada e reclama unha sentenza absolutoria.

PUBLICADA O

- Advertisement -

Xulgado do Penal número 1 de Lugo acolleu este martes a celebración do xuízo contra un home acusado de agredir no cárcere de Bonxe a un funcionario de prisións que lle solicitou porse a máscara na cela ao ser diagnosticado como positivo en Covid-19. Os feitos xulgados tiveron lugar o 2 de marzo de 2022, cando de acordo ao recolleito no escrito fiscal, o imputado, un home de 34 anos que cumpría condena no citado centro penal, foi requirido polos funcionarios de prisións a que “cesase na súa conduta de proferir berros, pechase a xanela e colocásese a máscara hixiénica”.

O acusado, que se atopaba en réxime de illamento sanitario no módulo de ingresos en cumprimento do protocolo Covid, fixo caso omiso á petición dos funcionarios (segundo o escrito de acusación) e tras proferir diversas ameazas abalanzouse sobre os traballadores unha vez que estes ingresaron na cela provocándolle a un deles lesións leves. Na vista celebrada este martes a xuíza tomou declaración ao acusado, que interveu por videoconferencia, e a dous dos funcionarios de prisións que ingresaron na cela para reducir ao home.

O imputado recoñeceu na súa exposición presentar “un pouco de resistencia” e lanzar “algunha patada ao aire” froito do estado de “ansiedade” no que se atopaba xa que, asegurou, “estaba illado e recibindo unha malleira tremenda”. Negou, con todo, ameazar aos funcionarios dicindo: “Se tedes ovos pasar e póndesme vós a máscara”, como recolle o escrito fiscal.

O funcionario de prisións que desempeñaba aquela tarde a tarefa de xefe de servizos, e que sufriu unha contusión no seu pé dereito mentres trataba de reducir ao acusado, precisou que o home se atopaba “moi alterado” aquel día, ratificouse na súa descrición do feitos pero renunciou á indemnización que puidese corresponderlle. O segundo dos funcionarios presentes no altercado explicou que o imputado ameazoulles asegurando que o seu pai os mataría na rúa e que “se abalanzou” sobre eles unha vez que procederon a entrar na cela.

FASE DE CONCLUSIÓNS

O Ministerio Público ratificouse na fase de conclusións na súa petición de dous anos e medio de cárcere para o acusado por un presunto delito de atentado a funcionario público en concurso cun delito leve de lesións. O fiscal destacou que o acusado non puido ser vítima dunha malleira por parte dos funcionarios xa que “non presentou ningunha denuncia” nin existe “informe médico algún do centro penal acreditando tales lesións”. O feito de que o funcionario que resultou ferido renuncie á indemnización demostra, sostén a Fiscalía, que non existe interese algún en prexudicar ao imputado.

A letrada da defensa, pola súa banda, fixo un chamamento na fase de conclusións a “avaliar todas as circunstancias”. Precisou que o home se atopaba no momento da presunta agresión en plena “crise convulsiva propiciada pola febre”, que a presenza de ata catro funcionarios na cela resultaba “intimidatoria” e que a pena solicitada pola Fiscalía resulta “desproporcionada”. O acusado puntualizou na súa última intervención que aquel día non puidera tomar a “medicación” recetada para os seus “trastornos mentais” e que en ningún momento tivo a intención de “pegar nin lesionar a ninguén”. O xuízo quedou este martes visto para sentenza.

ÚLTIMAS

A irmá da muller asasinada en 2016 polo “mal funcionamento” da Casa da Muller de Lugo recorrerá ao TSXG

Martina Gómez Nieto, irmá da muller asasinada polo seu esposo no municipio de Becerreá...

Investigan a un menor de 14 anos que conducía un coche sen carné en Vilalba

Un menor de 14 anos foi interceptado en Vilalba conducindo un cuadriciclo lixeiro sen permiso...

Desaloxados os veciños dun edificio de Lugo tras rexistrarse un incendio nunha das vivendas

Os veciños dun edificio situado na rúa Sanxillao de Lugo tiveron que ser desaloxados...

Descubertos varios sitios arqueolóxicos nos Ancares

O Colectivo Patrimonio dos Ancares comunicoulle á Xunta de Galicia a localización de varios...