Un veciño de Lugo sentará este venres no banco dos acusados para enfrontarse a unha pena de catro anos de prisión por un presunto delito de corrupción de menores na súa modalidade de distribución de pornografía infantil. A vista terá lugar no Xulgado do Penal número 1 de Lugo, onde se axuizará a responsabilidade do home a quen foron incautados varios dispositivos tecnolóxicos con contido pornográfico infantil tras o rexistro do seu domicilio en 2017.
Os arquivos en cuestión eran compartidos polo acusado, de acordo ao recolleito no escrito fiscal, con outros usuarios a través de aplicacións de mensaxería. Ademais da pena de catro anos de cárcere, o Ministerio Fiscal solicita tamén para o imputado a inhabilitación especial para o desenvolvemento de calquera profesión ou oficio que leve contacto regular e directo con menores durante un prazo de oito anos, así como un período de liberdade vixiada de cinco anos unha vez cumprida a pena.
