A alcaldesa de Lugo, Lara Méndez, confirmou que o Concello continuará coa derriba do Garañón, tras coñecer que o Xulgado do Contencioso-Administrativo número 2 rexeitou a solicitude de paralización cautelar presentada polo Banco Santander, como acredor principal da empresa que levantou as dúas torres.
Neste contexto, a rexedora confirmou que, independentemente dos recursos que presente a entidade financeira, o goberno local seguirá coa súa “folla de ruta” que mantén “desde 2017”, cando decidiu “non seguir co proceso xudicial” e “asumir a derriba” do proxecto situado xunto ao Parque Rosalía de Castro.
“Son procesos complexos, evidentemente, pero están a chegar ao seu fin. Seguimos co noso camiño paralelo con eses procesos xudiciais alleos ao Concello pero nos que loxicamente nos vemos implicados”, explicou en declaracións aos medios Méndez.
E é que a xunta de goberno local de Lugo adxudicaba a finais de decembro o proceso de derriba do Garañón por máis de medio millón de euros, co obxectivo de que nun prazo de seis meses estea xa demolido para poder instalar alí unha zona verde. Con todo, o proxecto está pendente aínda de recibir o visto e prace da Xunta.
